G'schwätz
A Zau em Wald. Drhendrd a gschbassiga, higliga Gegnd. No a baar Dabbr weidr ond ma kennt moina ma däd a Meierle säha, a bissle Beddo, Kammee ond Endlifdungsrohr. Was soll etzt au säll gschbassig Deng glei wisawih von dr Uni Ulm? Weidr goohts am Zau entlang. A offns Door! Gmächlich schlabba mr da kurvige Wäg bis zu ma grossa mit Spitzla vrsähana Door naa. Des ischr also, dr Blatz vom grossa Ulmer Fäschdle! 10 Johr lang geits etzt scho des Geokäsching. Em säbdembr 2000 hot ma da erschde Käsch bei Geokäsching.kom naidoo. Scho em Mai 2000 hot dr Dave Ulmr da erschde Käsch von dr ganza Wäld vrschdeggt. Wo also, wenn net en Ulm ka ma so a Jubiläum feira? Des wella mr vom 18. bis 20 Juni 2010 mit Eich zamma in ra granadamässig tolla Umgäbung feira. Net emma guat glifdada Saal sondrn midda em a scheena alda faschd 130 Johr alda Gmäur (Loschd Blais) wo de ledschde 30 Johr koi Sau meh war ausser a baar Schoof, Goißa ond ma Esl där Paule hoißt. A Fäschdle irgndwo zwischa Bierkällr ond Biergarda. A schees alds Gmäur halt, glei näbs dr omdriebiga Uni. Ds Fäschdle ond des Dromrom goohd 3 Däg lang. Om des Ganze fr eich bsondrs schhe zmacha, kennad ogfähr 300 Leit diräkt em Fort zom schlofa naschdragga. Mir schloofad en de frihere Wohnkassemadda, Wachtraim ond Bulvrmagazee. Im Graba dromrom kennad'r kloine Zelt aufbaua. Abr, wär zerschd kommt mohlt zerschd odr wer edd will, hot khedd ond wer khedd hot, braucht nix mai! Soll hoißa dass wär sich zerschd amäldat griagt da Blatz. S'Dromrombrogramm setzt sich aus ma Haufa sauguate Sacha zamma. Aagfanga beim Kendrfäschdle „FORTbewegung“ übr Schbezialfihrunga, Seminar ond Vordräg ondr dem Begriff „FORTbildung“ bis zu ma T5-Iwend fir FORTgeschrittene. FORTschrittliche Gschäfdsleid zoigat ihr Zuigs her, ägschdra frd Geokäschr. Am ledschda Dag geits noo a FORTschaffa. Des isch a CITO (Geokäschr-Kehrwoch) om da ganza Drägg ond älles Glomb wiedr wägzomraima was mr en denne 3 Däg hand schdragga lassa. Drnoch wella mr hoffa, dass es em nägschda Johr a FORTsetzong geit.
|
 |
Obrhalb von all dene Gäng, Schdolla ond Kasemadda, em Schadda von a baar scheene alde baim hogga mr gmiadlich zeama om oos Gschichda ond Gschichdla z'vrzehla ond zom loosa was de Andre so wissad. Ond weil von Nix nix kommt ond was nix koscht au nix isch, hammr denkt mr vrlangad 15 Euro von Eich pro Mannschafd. Gild nadierlich au fr Gälbfiaslr, Boyra, Breissa ond sogar fr Allgair ond Schlu…äh Eschdreichr. Oifach damid mr bessr blana kennad, gell. Drfir griagat'r näbs am Feschdle a ägschdra Fäschdles-Coin dia ma em koin Gschäffd net kaufa kaa ond wenn'r schnäll gnuag beim Amelda send, no kriagat'r sogar no a Blätzle zom Ibrnachda direkt em Fort. Des isch doch was, odr?
